AFC/M23 Yirukanye Umuyobozi wa Kaminuza ya Goma Ishyiraho Ubuyobozi Bushya

Ubuyobozi bwa Kaminuza ya Goma (UNIGOM) bwakozwemo impinduka zikomeye nyuma y’uko Professor Muhindo Mughanda akuwe ku mwanya wa Recteur wa kaminuza ako kanya.

Nk’uko bigaragara mu itangazo ryashyizwe ahagaragara n’abayobozi, iki cyemezo cyafashwe hashingiwe ku mategeko agenga abakozi bo mu mashuri makuru, za kaminuza ndetse n’ubushakashatsi bwa siyansi. Iryo tangazo ryemeje kandi ko ibyemezo byose byari bisanzwe binyuranyije n’iki bikuwemo.

Inyandiko nshya yashyizwe hanze na Alliance Fleuve Congo (AFC/M23) igaragaza ko Professor Jean Baptiste Kakoma Sakatolo Zambeze yagizwe Umuyobozi Mushya wa Kaminuza ya Goma.

Icyemezo cyashyizweho umukono ku wa 29 Gicurasi 2026 cyanatangaje abandi bayobozi bashya bagiye gukora mu buyobozi bwa kaminuza, barimo:

• Professor Richard Kabuyanga Kabuseba wagizwe Umunyamabanga Mukuru ushinzwe amasomo,
• Professor Nzabandora Ndimubanzi ushinzwe ubushakashatsi,
• Chef de Travaux Butotima Safari wagizwe Umunyamabanga Mukuru w’ubutegetsi,
• na Chef de Travaux Paluku Malisawa wagizwe ushinzwe ingengo y’imari.

Izi mpinduka zasinyweho n’abayobozi ba AFC/M23 barimo Bertrand Bisimwa na Corneille Nangaa Yobeluo i Goma muri Kivu y’Amajyaruguru.

Izi mpinduka mu buyobozi bwa UNIGOM zikomeje gukurura impaka n’ibitekerezo byinshi mu nzego za politiki n’iz’uburezi muri Repubulika Iharanira Demokarasi ya Congo.