Perezida Samia yashyize umukobwa we n’umukwe we muri guverinoma nshya

Perezida wa Tanzania Samia Suluhu Hassan yakoze impinduka zikomeye muri Guverinoma nshya ayoboye, zirimo gushyira umukobwa we, Wanu Hafidh Ameir, ku mwanya wa Minisitiri wungirije w’Uburezi, ndetse umukwe we, Mohamed Mchengerwa, agirwa Minisitiri w’Ubuzima.

Izi mpinduka zije nyuma y’uko Perezida Samia arahiriye gukomeza kuyobora Tanzania nyuma y’amatora yo ku wa 29 Ukwakira 2025, yakurikiwe n’imvururu z’abatavuga rumwe na Leta.

Wanu Hafidh Ameir: Umukobwa wa Perezida Winjiye muri Guverinoma

Wanu Hafidh Ameir w’imyaka 43, asanzwe azwi mu ruhando rwa politiki ya Tanzania.

• Yatowe mu Nteko Ishinga Amategeko ahagarariye agace ka Makunduchi, ku itike y’ishyaka CCM.

• Yatorewe uyu mwanya mu matora yabaye ku wa 29 Ukwakira 2025.

• Uretse kuba umukobwa wa Perezida Samia Suluhu, yamenyekanye cyane mu bikorwa by’iterambere n’inyungu z’abaturage bo mu karere ahagarariye, byamuhaye izina mu baturage n’abayobozi b’ishyaka.

Kwinjizwa muri Minisiteri y’Uburezi nk’Umuyobozi wungirije bije mu gihe Tanzania iri gushyira imbaraga mu gusubiza ku murongo ireme ry’uburezi n’icyuho kiri mu bumenyi bukenewe ku isoko ry’umurimo.

Mohamed Mchengerwa: Umukwe wa Suluhu Ushinzwe Ubuzima

Mohamed Mchengerwa, umugabo wa Wanu Hafidh Ameir, na we ari mu bayobozi bashyizwe muri Guverinoma nshya.

• Afite uburambe mu buyobozi, kuko yigeze kuba Minisitiri mu nzego zitandukanye zirimo urubyiruko, imikino n'itangazamakuru.

• Azwiho kuba umunyamategeko w’umwuga n’umuyobozi ushyira imbaraga mu micungire y’imishinga za Leta.

Ubu yashyizwe ku mwanya ukomeye wa Minisitiri w’Ubuzima, aho asabwa gukomeza kuvugurura serivisi z’ubuvuzi no kongera uburyo bwo kwakira no kuvura abaturage.

Abandi Bayobozi Bashya mu Guverinoma

Mu bandi bahawe inshingano harimo:

• Ridhwani Kikwete, umuhungu w’uwahoze ari Perezida Jakaya Kikwete, wagizwe Minisitiri mu Biro bya Perezida Hassan, ashinzwe imiyoborere n’imicungire y’ibikorwa rusange.

• Khamis Musa Omar, Minisitiri w’Imari.

• Mahmoud Thabit Kombo, Minisitiri w’Ububanyi n’Amahanga.

• Prof. Riziki Shemdoe, Minisitiri w’Uburezi (aho azaba yungirijwe na Wanu Hafidh Ameir).

• Daniel Chongolo, Minisitiri w’Ubuhinzi.

• Judith Kapinga, Minisitiri w’Ubucuruzi n’Inganda.

Guverinoma nshya igizwe n’abaminisitiri 27 n’abaminisitiri bungirije 29.

Abaminisitiri barindwi bari muri manda ishize ntibagarutse, barimo:

• Doto Biteko (Ingufu),

• Hussein Bashe (Ubuhinzi),

• Seleman Jafo (Inganda).

Izi mpinduka mu buyobozi zigaragaza icyerekezo gishya cya Perezida Samia Suluhu, aho yibanda ku guhuza ubuyobozi n’abantu afitiye icyizere ko bazageza igihugu ku iterambere rishimangira imiyoborere myiza n’imiyoborere iharanira inyungu z'abaturage.

Guverinoma nshya itegerejweho kunoza imikorere, kwihutisha impinduka mu burezi n’ubuzima, no gushyira imbere umutekano w’abaturage n’iterambere ry’igihugu.

Noel Mporebuke